للتذكره – رومانيا الثوره الفاشله

عارفين ايه الصورة دي؟؟

دي مش مصر دي رومانيا الثورة الرومانيه

الثورة التي أضحكت العالم عارفين ضحكتوا ليه عشان ثورة هبله و إتسرقت
أقولكم إتسرقت إزاي؟.

الشعب الروماني عمل ثورة ضد نيكولا شاوشيسكو وزوجته ايلينا عشان كان مبوظ إقتصاد رومانيا و سارقها و ماكنش في عدالة إجتماعيه وتم القبض عليه تمهيدا لمحاكمته ، حيث حكم عليه وعلى زوجته بالاعدام رميا بالرصاص , وفي نفس تم تنفيذ الحكم فورا. بمساعده الجيش و الناس فرحت برده و قعدوا يقولوا الجيش و الشعب إيد واحده
يعني إتقتل كمان مش إتحاكم و هو لابس ترنج و بيلعب في مناخيره

ماشي ايه اللي حصل بعدين؟؟

مسك الحكم جهه سياسيه بتتكون من الصف التاني بالحزب الشيوعي الروماني ((فلول يعني)) و كان رئيس الحزب ده واحد إسمه إيون إيليسكو و ده احد حلفاء الديكتاتور المعدوم ((صاحبه يعني ))
أخونا ايون ده عمل صفقات مع جنرالات الجيش الروماني صفقات خلته يسيطر على على التليفزيون والراديو وباقى وسائل الاعلام فى الدولة .

و بعدين اخونا ايون بقى يتهم الشباب الرومانيين اللي بيقولوا عليه مغتصب للسلطه و للثورة إنهم عملاء و جواسيس و بيخدوا تمويل من جهات خارجيه و إنهم أجندات أجنبيه
و بقى ينكل بأي حد يعارض سياسته و يقول إن دي مرحلة إنتقاليه و إن هو مصر يوصل برومانيا لبر الأمان
و فئه غير مثقفه من أبناء الشعب الروماني صدقته و بقت تهاجم الشباب اللي كان عارف إن الثورة بتتسرق لدرجة عمال المناجم بمساعدة رجال الشرطه بالهجوم على الطلبه والمثقفين اثناء تظاهرهم . و قتلوا منهم من قتلوا

و نجحت جبهة الخلاص اللي بيرأسها ايون (( الفلول)) بالفعل فى اسكات المعارضه الديموقراطيه باستخدام الاعلام الموجه وتم انتخاب إيون إيليسكو رئيسا للبلاد بنسبة 85% من الاصوات، وهى الانتخابات التى وصمت بعدم النزاهه من قبل الاحزاب الديموقراطيه والاعلام الغربى، اعيد انتخاب نفس الرجل ثلاث مرات حتى العام 2000

الجدير بالذكر حينما نتحدث عن ثمن تلك الثورة المجهضه هو عدد الضحايا : العدد الكلى لمن ماتوا كان 1,104 رومانيا منهم 162 فقط قبل تنحية شاشيسكو والباقون فى فترة الانفلات الامنى المدبره على يد جبهة الخلاص الوطنى، اصيب 3,352 رومانيا منهم 1,107 قبل القبض على الديكتاتور،

طبعا الثورة الرومانيه مختلفه تماما عن الثورة المصريه لأن إحنا ماعدش عندنا فلول و كمان الجيش بيحمي الثورة و إحنا بناكل رز بلبن